പുതുവർഷപ്പുലരി

നവോഢയാം നവവർഷം,
തുടുത്തു കിഴക്കേമാനം,
അലസനാം കുളിർകാറ്റ്,
ജീവന്റെ ചെറുചൂടുമായ്
മെല്ലെ മിഴിതുറന്നു ഭൂമി,
അഭൗമമാം പ്രശോഭ .

പുഞ്ചിരിക്കും കുസുമങ്ങൾ,
നവപുഷ്പസൗരഭ്യമെങ്ങും,
പുൽത്തുമ്പിൽ ഹിമകണം,
ഗാനം മൂളി, കോകിലങ്ങൾ.

നീലവിഹായസ്സുപോൽ
പ്രസന്നമാം മനുഷ്യമനസ്സ്,
അലയടിച്ചന്തരീക്ഷത്തിൽ
സൗഹൃദത്തിൻ പൊട്ടിച്ചിരി.

നന്മയും ശാന്തിയും കളിയാടും
ആഹ്ളാദത്തിരമാലകൾ,
പ്രകൃതിയും നാമുമൊന്നാകും
പുതുവർഷത്തിൻ നാളുകൾ.