സ്മരണീയമുഹൂർത്തങ്ങൾ

കവിത.

...........

സ്മരണീയമുഹൂർത്തങ്ങൾ.

....................................

പാതിയടഞ്ഞോരു

കുങ്കുമച്ചെപ്പുപോൽ,

ആദിത്യനാഴിയി-

ലാണ്ടു തുടങ്ങവെ,

ചെങ്കതിരേറ്റു തി -

ളങ്ങുന്ന മാനത്ത്,

കൂടൊന്നണയാൻ 

പറക്കുന്നു പക്ഷികൾ,

സായന്തനത്തിന്റെ

ശോഭ നുണഞ്ഞുകൊ-

ണ്ടിന്നീ വിജനമാം

തീരത്തിരിക്കവെ,

തീരത്തണഞ്ഞിടും

തിരമാലകൾ പോലെ,

ദൂരത്തുനിന്നു വ -

രുന്നിതെന്നോർമ്മകൾ,

പണ്ടൊരു സന്ധ്യയിൽ,

ഈ സ്വർഗ്ഗതീരത്ത്,

മൽസഖീയാദ്യമായ് 

നിന്നെ ഞാൻ കണ്ടതും,

രാവിൻ തിരശ്ശീല 

വീഴുന്നതിൻ മുമ്പ്,

നിന്മുഖം കാണുവാ-

നേറെക്കൊതിച്ചതും,

മുന്നോട്ടു വീണ നിൻ

കുറുനിരത്തുമ്പുകൾ,

വെയിലിൻ പ്രശോഭയിൽ

പൊന്നാട നെയ്തതും,

അരുണിമയോലും

കവിൾത്തടം കാണവെ,

നെഞ്ചിലെക്കനവുകൾ

പൂത്തുല്ലസിച്ചതും,

മൗനം പൊഴിക്കുന്ന 

നീൾമിഴിക്കോണുകൾ,

അലസമായെന്നുടെ

ഹൃത്തിൽ പതിഞ്ഞതും,

അഞ്ജനം ചാലിച്ച

നിൻ നയനങ്ങളിൽ,

നിർമ്മലസ്നേഹവി -

ഹായസ്സു കണ്ടതും,

നിൻ പാദപങ്കജം

ചുംബിച്ചു പിൻവാങ്ങു-

മലയോടെനിക്ക-

ന്നസൂയ ജനിച്ചതും,

മമസഖിയായി നീ

ജീവിതവാടിയിൽ,

നവ്യമാം പ്രേമസു -

ഗന്ധം ചൊരിഞ്ഞതും,

രാവിൽ നിലാക്കടൽ

പൊന്നല തീർക്കവെ,

ആനന്ദചിത്തരായ്

കാവ്യം രചിച്ചതും,

അംഗുലീബദ്ധരാ-

യീ മണൽത്തിട്ടയിൽ,

താരകപ്പൂക്കളം 

പാർത്തുകിടന്നതും,

കാതോട് കാതോര-

മോതിയ തേൻമൊഴി,

പ്രണയത്തിൻ മായാ-

പ്രപഞ്ചങ്ങൾ തീർത്തതും,

പെട്ടെന്നൊരു നാളിൽ,

കർക്കിടസന്ധ്യയിൽ,

മൃത്യു, തൻകൈകളാൽ 

നിന്നെ ഗ്രഹിച്ചതും,

ദു:ഖത്തിൻ ഗർത്തമാ-

മെന്നുടെ ചിത്തത്തിൽ,

വ്യർത്ഥമാം ശൂന്യത 

വന്നു നിറഞ്ഞതും,

എല്ലാം മറന്നിന്നു 

മാനസമെങ്കിലും,

കരളിൽ തപിക്കുന്നു,

നീറുന്നയോർമ്മകൾ,

നിന്നുടെ സാന്നിധ്യ -

മിന്നുമറിയുന്നു,

ഈ കടൽത്തീരത്തു

ധ്യാനിച്ചിരിക്കവെ.

Dr.Manoj.M.R.

9387836710