എന്നെത്തിരഞ്ഞ്

എന്നെത്തിരഞ്ഞ്.

...............................

വർണ്ണപ്പകിട്ടാർന്ന-

യോർമ്മയെന്നിൽ,

അഴകാർന്ന ചിത്രം

വരച്ചിരുന്നു,

വാസന്തഋതുവിലെ

പൂവാടിയിൽ,

മദനോത്സവങ്ങൾ

ചമച്ചിരുന്നു,

വെണ്ണിലാവൊഴുകും

നിശീഥിനിയിൽ,

മോഹക്കിനാവുകൾ

നെയ്തിരുന്നു,

രാഗാർദ്രമാമി -

ക്കിനാവുകളിൽ,

ആനന്ദലഹരി

നിറഞ്ഞിരുന്നു,

നീറുന്ന നോവു

ശമിക്കുവാനായ്,

മായക്കിനാവിൽ

ലയിച്ചിരുന്നു,

ധനുമാസരാവിലെ

കോടമഞ്ഞിൽ,

കവിതകൾ പാടി

നടന്നിരുന്നു,

വാക്കും മൊഴികളു-

മെന്നുമെന്നിൽ,

കല്പിതകഥകൾ

രചിച്ചിരുന്നു,

ഓർമ്മകളില്ലാത്ത

മാനസത്തെ,

ചിന്തിക്കുവാനേ

കഴിഞ്ഞതില്ല,

വാർധക്യനാളുകൾ

വന്നീടവെ,

മനസ്സിൽ തിരശ്ശീല

വീണപോലെ,

മഞ്ഞിൽ മറഞ്ഞുപോം

താഴ്വരപോൽ,

മറയുന്നു മാനസ-

ദൃശ്യങ്ങളും,

തിമിരത്താൽ മങ്ങിയ

കാഴ്ചപോലെ,

മൂടുപടം ചൂടി -

യോർമ്മകളും,

വിടചൊല്ലിപ്പോകുന്നു

സ്വപ്നലോകം,

നിറംകെട്ടു മങ്ങു -

ന്നനുഭവങ്ങൾ,

തെളിയാതിരിക്കും

വിചാരങ്ങളിൽ,

അറിവിന്റെ പാഠങ്ങ -

ളകലുന്നുവോ,

അർത്ഥം തുടിക്കാത്ത

വാക്കുകളിൽ,

ഭ്രാന്തമാം വ്യർത്ഥത

തേങ്ങുന്നുവോ,

ഓർമ്മതന്നാഴി

വരണ്ടുണങ്ങി,

ഓർമ്മമേഘങ്ങളും

യാത്രയായി,

ഹൃദയം തകർക്കുന്ന

വേദനകൾ,

അന്തരാത്മാവി-

ലിടം പിടിച്ചു,

അമ്മതൻ താരാട്ടി -

ന്നീണമിന്ന്,

കേൾക്കാത്ത പാട്ടാ-

യകന്നുപോയി,

അച്ഛന്റെയധ്വാന -

ച്ചൂരുണ്ടല്ലോ, ആ,

ധൈര്യത്തിൻ വാസന -

യെങ്ങുപോയി,

കസ്തൂരിമണമെഴും

പെങ്ങളേ, നിൻ,

കാൽത്തളക്കിലുക്ക -

മിന്നെങ്ങുപോയി,

കെട്ടിപ്പുണരുമെൻ

കൂട്ടുകാരാ,

എന്തേയെന്നുള്ളം

മറന്നു നിന്നെ,

സ്നേഹത്തലോടൽ

കൊതിച്ചിരിക്കെ,

അനുരാഗശാലിനീ,

സഹധർമ്മിണീ,

നിന്മിഴിപ്പൂക്കൾ

മറന്നുവോ ഞാൻ,

മരവിച്ചുവോ, എന്റെ

മാനസവും,

ഹൃദയത്തിലാനന്ദ -

ത്തിരയിളക്കും,

മകനേ, നിൻ പൂത്തി-

രിപ്പുഞ്ചിരിയും,

ചക്രവാളത്തിലെ

പക്ഷിയെപ്പോൽ,

നിറമില്ലാ നിഴലായി -

ത്തീർന്നതെന്തേ,

വിസ്മൃതിയെന്നിൽ

പടർന്നീടവെ,

ഭീതിയിലാഴുന്നു -

വന്തരംഗം,

ഏകാന്തതയുടെ

ശൂന്യതയിൽ,

ദു:ഖം കനക്കുന്നു

നെഞ്ചകത്തിൽ,

ഓർമ്മത്തുരുത്തുകൾ

തേടീടവെ,

വിസ്മൃതമായെന്റെ

പേരുമൂരും,

മറവിയിലാഴുന്നു

വ്യക്തിബോധം,

മൃത്യുവിൻ ലോകത്ത-

ണഞ്ഞുവോ ഞാൻ,

ബോധാബോധങ്ങ -

ളിലേകനായി,

നൂലറ്റ പട്ടമായ്

പാറീടവെ,

ആരാണ് ഞാനെന്ന്

ചൊല്ലിത്തരൂ,

ആരേലുമെന്നോട്

ചൊല്ലിത്തരൂ.