Thapovanam

നുറുങ്ങുകവിത. മാതൃഭാഷ. ..................... മനം നിറഞ്ഞുപാടും വരികൾ മാതൃഭാഷയല്ലയോ! മനമുരുകിക്കേഴും വാക്ക് മാതൃഭാഷയല്ലയോ! ഭാഷയാണ് ജീവിതം, ഭാഷ തന്നെയാശയം, മാതൃഭാഷ മനസ്സിനേകും മൗലികമാം ചിന്തകൾ . 🌹🌹🌹🌹🌹🌹 Dr Manoj M R.

കവിത. പൊങ്കാല. ....................... ജ്ഞാനാഗ്നിയായി  തെളിയുന്നവബോധം  ധ്യാനസുഭഗമാം  ജീവിതത്തിൽ , ഹോമാഗ്നിയായി ഉയരുന്നവബോധം  ശ്രദ്ധാലുവാകും  നിമിഷങ്ങളിൽ , ദു:ഖങ്ങൾ മോഹങ്ങൾ കൊച്ചുസന്തോഷങ്ങൾ, ഹോമാഗ്നി തന്നിൽ  ലയിച്ചിടുന്നു , ഞാനെന്നും നീയെന്നും  ഉള്ള വിചാരങ്ങൾ, ജ്ഞാനാഗ്നി തന്നിൽ  മറഞ്ഞിടുന്നു, എന്റെ മനസ്സും  ഹൃദയവും ബുദ്ധിയും , ശുദ്ധാവബോധത്തിൽ ആഴ്ന്നിടുന്നു , ആത്മപ്രസാദമീ പൊങ്കാലനൈവേദ്യം, അദ്വൈതസത്യത്തിൻ  ആത്മരൂപം. 🌹🌹🌹🌹🌹🌹  Dr Manoj M R.

കവിത. പ്രണയമെന്നിൽ .... ................................. പ്രണയമെന്നിൽ  തഴുകും കാളിന്ദിയായി , അലകളായെന്നിൽ നീ ആനന്ദമായി , നീലക്കടമ്പുകൾ  പൂക്കുന്നിടത്തെ ആർദ്രമാം പാലൊളി - ച്ചന്ദ്രികയായി , മോഹങ്ങൾ താണ്ടി ഞാൻ എന്നെ മറക്കവേ, അതിരില്ലാക്കടലായി  പ്രണയമെന്നുള്ളിൽ , മൗനത്തിലാണ്ടു ഞാൻ  എന്നെ മറക്കവേ , ഗഗനസമാനമായ്  സ്നേഹമെന്നുള്ളിൽ . 🌹🌹🌹🌹🌹🌹 Dr Manoj M R.

കവിത. ഒ.എൻ.വി. (O.N.V) ............................. ഓർമ്മയിൽ പൂത്തോരു  ചെമ്പകമേ! എൻ ഹൃദയത്തിൽ പരിലസിപ്പൂ , വിശുദ്ധിയോലും നിന്നക്ഷരങ്ങൾ , കാവ്യസുഗന്ധം ചുരത്തിനിൽപ്പൂ , ഈ വഴിത്താരയിൽ, ജീവിതത്തിൽ, പാന്ഥമനസ്സ്  തളർന്നിടുമ്പോൾ, ഉണർവ്വേകും പാട്ടായ് പടർന്നുവങ്ങ്, ചൈത്രനിലാവായ് പുണർന്നുവങ്ങ് . 🌹🌹🌹🌹🌹🌹 Dr Manoj M R.

കവിത. ലതാജി ... ......................... ഗന്ധർവ്വലോകത്തെ സംഗീതമേ ! ദൈവികം നിന്നുടെ സ്വരമാധുരി , രാഗങ്ങൾ നിന്നിലെ പ്രാണവായു , ലയമായി നിന്നിലെ ഹൃദയതാളം , ആർദ്രമാം നിന്നുടെ ആത്മഭാവം , കേട്ടുപഠിച്ചുവോ വാനമ്പാടി , പാട്ടിൻ സുഗന്ധമേ ! ഒഴുകുന്നു നീ ഭൂവിലനന്തമാം  നാദമായി . 🌹🌹🌹🌹🌹🌹 Dr Manoj M R.

നുറുങ്ങുകവിത. തടിയൻ. .................... കാലം പോയതറിഞ്ഞില്ലല്ലോ, കോലം മാറിയതറിവുണ്ടല്ലോ, ഓർമ്മയിലേയ്ക്ക് കുതിച്ചുവരുന്നു കുഞ്ഞുന്നാളിലെ കുരുത്തക്കേട്, പണ്ടൊരു തടിയൻ ജോർജ്ജെസ് ജോർജ്ജ് കുണ്ടാമണ്ടികൾ ഒപ്പിച്ചപ്പോൾ ഏറെ രസിച്ചു ചിരിച്ചു മറിഞ്ഞു, ഇന്നും മധുരം മനസ്സിലുണ്ടേ . 🌹🌹🌹🌹🌹🌹 Dr Manoj M R.