Thapovanam

ഉദയകിരണങ്ങൾ . ................................. ദുരിതം വിതയ്ക്കുന്നു  മാരിയെങ്ങും , ഭയമിരുട്ടായി  പടർന്നുവുള്ളിൽ, മരണത്തണുപ്പിൽ  വിറച്ചു പ്രാണൻ , അക്കങ്ങളായി  മനുഷ്യജീവൻ , പരതുന്നു ചിന്ത - യെൻ മാനസത്തിൽ  ജീവന്റെ കാണാ- ത്തിരിപ്പിടങ്ങൾ, ഉൾക്കരുത്തേകും  വിവേകസൂര്യൻ ഉദയകിരണങ്ങൾ  ചൊരിഞ്ഞുവെന്നിൽ , വീണ്ടും കിളിർക്കുന്നു  പുൽനാമ്പുകൾ,  പിന്നെയും പൂക്കുന്നു  പിച്ചകങ്ങൾ, തത്തിക്കളിക്കുന്നു  പൂത്തുമ്പികൾ, ജീവന്റെയനുരാഗ- വർഷധാര. Dr Manoj M R.

ഗാനം. ഈണത്തിൽ പാടുന്ന ... ................................... ഈണത്തിൽ പാടുന്ന പൂങ്കുയിലേ, നിൻ ഗാനത്തിൻ രാഗങ്ങളെങ്ങു നിന്ന് , ഹൃദയവിപഞ്ചിക  പാടുന്നതോ, നിന്നിൽ പ്രണയവസന്തം  വിരുന്നുവന്നോ  ( ഈണത്തിൽ ...) നിൻ പ്രേമഗാനങ്ങൾ  കേൾക്കുന്ന നേരത്ത്  സ്വർഗ്ഗീയപുഷ്പങ്ങൾ  പൂത്തുവെന്നിൽ , നിൻ രാഗമാലിക  സ്വീകരിച്ചീടുമ്പോൾ  മധുരിമ നിറയുന്നു  എന്റെയുള്ളിൽ  ( ഈണത്തിൽ ...) ജലരേഖയായുള്ള  ജീവിതയാത്രയിൽ  ആശ്വാസമേകുന്നു നിന്റെ ഗീതം, പാദങ്ങളിൽ കൂർത്ത  മുള്ളു തറയ്ക്കുമ്പോൾ  സ്നേഹത്തിൻ ലേപനം  നിന്റെ ഗാനം  ( ഈണത്തിൽ .....) Dr Manoj M R.

ഉത്സവമില്ലാത്തവർ. ................................... കുംഭമാസത്തിലെ മായുന്ന സന്ധ്യയിൽ ശ്രീകാളിയമ്മതൻ കോവിലിലുത്സവം, ചെണ്ടമേളത്തിന്റെ  ചടുലതാളത്തിലായ് മേളക്കൊഴുപ്പേകി - യുത്സവക്കാഴ്ചകൾ, വെട്ടിത്തിളങ്ങുന്നു വർണ്ണദീപങ്ങളും , തലയാട്ടിനിൽക്കുന്നു ഗജരാജവീരരും, ഉച്ചത്തിലായങ്ങു പൊട്ടും കതിനകൾ, ഉത്സാഹമോടെ രസിക്കുന്നു നാട്ടുകാർ, ഉത്സവമില്ലാതെ പാതയോരത്തതാ നന്നേ വയറൊട്ടിയൊ രമ്മയും പൈതലും, ദൈന്യനിർജ്ജീവ - നയനങ്ങളോടവർ കൈതലം നീട്ടുന്നു  കാരുണ്യപ്പറ്റിനായ് . Dr Manoj M R.

മാലാഖയല്ല ..... ........................... നേഴ്സുമാരാണു ഞങ്ങൾ ! വേദനയാളും നിൻ  ദേഹത്തിനിന്നൊരു  സാന്ത്വനമേകുന്ന  സ്നേഹസ്പർശം, നേഴ്സുമാരാണു ഞങ്ങൾ ! കദനത്തിൻ വേനലിൽ  കുളിർമഴയാകുന്ന മധുരിമയുള്ളൊരു  മന്ദഹാസം, നേഴ്സുമാരാണു ഞങ്ങൾ ! ഒറ്റപ്പെടലിൻ ഇരുട്ടറയിൽ ഉഴറും നിനക്കൊരു  കൈവിളക്ക്, നേഴ്സുമാരാണു ഞങ്ങൾ ! ആകുലചിന്തകൾ  നിന്നെയലട്ടവെ ക്ഷമയോടെ കേൾക്കുന്ന മാതൃഭാവം, പക്ഷെ, മാലാഖയല്ല ഞങ്ങൾ ! പശിയും കഥകളും ദാഹമോഹങ്ങളും  കെട്ടുപിണയും മനുഷ്യജന്മം, ദൈവദൂതരല്ല ഞങ്ങൾ ! ഇത്തിരി സ്നേഹവും ഇത്തിരി നന്മയും  കെട്ടുപോകാത്ത  മനുഷ്യജന്മം. Dr Manoj M R.

അമ്മ . ...............  പാപച്ചെളിക്കുണ്ടിൽ മുങ്ങിയെന്നാകിലും, വീഴ്ചയിലേറെ കിത - ച്ചുവെന്നാകിലും, സർവ്വംസഹയായ ധരണി നീയെന്നപോൽ എന്നുമാശ്ലേഷിക്കും കരുതലിൻപേരമ്മ, വെള്ളാരം കല്ലിന്മേൽ പൊട്ടിച്ചിതറുന്നോ - രരുവിതൻ മിന്നും ജലകണംപോലവെ , പായുമെൻ മോഹക്ക- നവിൻ ദലങ്ങളിൽ നിശ്വാസച്ചൂടിന്റെ  ഉത്കണ്ഠയാണമ്മ, അറിവിന്റെയാദ്യത്തെ വാക്കായ് പിറന്നതും മുന്നിലെ ലോകത്തെ തൊട്ടുപഠിച്ചതും , തെറ്റുതിരുത്തും മനസ്സാക്ഷിയായിട്ടും ഉള്ളിൽ വിരിഞ്ഞോരു ധാരണതന്നമ്മ , താരാട്ടുപാട്ടിന്റെ - യീണവിരുന്നായി ക്ഷീണമകറ്റുന്ന നിർമ്മലശയ്യയായ് , മെല്ലെത്തലോടുന്ന സ്നേഹസമീരന്റെ  കൊഞ്ചും മൊഴിയുടെ തഴുകലിൻപേരമ്മ, ആകാശവട്ടത്തി - ലാളുന്ന സൂര്യനായ് ജീവന്റെയുള്ളിലെ ആത്മവിശുദ്ധിയായ്, ഹൃദയത്തിൽനിന്നും നിറഞ്ഞങ്ങൊഴുകുന്ന ദിവ്യപ്രകൃതിയാം ഗംഗതൻപേരമ്മ. Dr Manoj M R.

വസന്തം. .................. വന്നണഞ്ഞല്ലോ  വസന്തകാലം, ഹൃദയങ്ങൾ പൂക്കും  പ്രണയകാലം, നിൻ മിഴിയിണകളിൽ  കണ്ടു ഞാനും മദനോത്സവത്തിൻ  മലർവാടികൾ, പ്രേമവിവശയാം  സൂര്യകാന്തി, പ്രണയമായ് പടരുന്ന മുല്ലവള്ളി, രാഗസുഗന്ധിയാം  പനിനീർപ്പൂവ്, നിർമ്മലസ്നേഹത്തി - ന്നാമ്പൽപ്പൂവ്, മാധുര്യമോടെ  നിറഞ്ഞുവെന്നിൽ  ആത്മഹർഷത്തിൻ  തിരമാലകൾ, പൂങ്കുയിൽപ്പാട്ടിൻ  വസന്തരാഗം മോഹനകാവ്യം  രചിച്ചുവെന്നിൽ. Dr Manoj M R.

കവിത. .............. കവിതേ നീ ബാല്യത്തിൻ  മാമ്പഴമധുവായി , അമ്മതൻ മാറിലെ  വാത്സല്യത്തേനായി, കവിതേ നീ പ്രണയത്തിൻ മുല്ലപ്പൂമൊട്ടായി , പരിമളം തൂകുന്ന  രാഗവസന്തമായ് , കനവു നിറഞ്ഞോരു  നീഹാരബിന്ദുവായ് , ഉള്ളകം നീറുന്ന  നോവിൻ കടലായി, കവിതേ നീ ഹൃദയത്തിൽ  സംഗീതധാരയായ് , ആത്മവിശുദ്ധിതൻ  നീലനഭസ്സായി. Dr Manoj M R.

വീട്ടിലിരിക്കണ ചങ്ങാതീ നിന്റെ ലക്ഷ്യങ്ങളൊന്നും മറക്കല്ലേ  (2) കോവിഡണുവിന്റെ വ്യാപനച്ചങ്ങല ക്കണ്ണി മുറിക്കാൻ മറക്കല്ലേ    (2) സോപ്പിട്ടു കൈകൾ കഴുകേണം പിന്നെ മാസ്കുധരിക്കുവാനോർക്കേണം 2) കണ്ണിലും മൂക്കിലും തൊട്ടു കളിക്കണ്ട ചൂടുള്ള വെള്ളം കുടിക്കേണം    (2) വീട്ടിലിരിക്കണ ചങ്ങാതീ നിന്റെ ലക്ഷ്യങ്ങളൊന്നും മറക്കല്ലേ കോവിഡണുവിന്റെ വ്യാപനച്ചങ്ങല ക്കണ്ണി മുറിക്കാൻ മറക്കല്ലേ   റോഡിലിറങ്ങുവാൻ നോക്കല്ലേ നിങ്ങെടെ വീട്ടിലെ ജോലികൾ ചെയ്യാലോ    (2) കൂട്ടങ്ങൾ കൂടി സൊറ പറഞ്ഞീടുവാൻ  നോക്കല്ലേ ഓമനച്ചങ്ങാതീ(2) വീട്ടിലിരിക്കണ ചങ്ങാതീ നിന്റെ ലക്ഷ്യങ്ങളൊന്നും മറക്കല്ലേ കോവിഡണുവിന്റെ വ്യാപനച്ചങ്ങല ക്കണ്ണി മുറിക്കാൻ മറക്കല്ലേ   നല്ല കവിതയും നോവൽക്കഥകളും ഇത്തിരിനേരം നുണഞ്ഞീടാം   (2) പാട്ടുകൾ പാടിയും നൃത്തം ചവിട്ടിയും  ചിത്രംവരച്ചും കഴിഞ്ഞീടാം    (2) വീട്ടിലിരിക്കണ ചങ്ങാതീ നിന്റെ ലക്ഷ്യങ്ങളൊന്നും മറക്കല്ലേ കോവിഡണുവിന്റെ വ്യാപനച്ചങ്ങല ക്കണ്ണി മുറിക്കാൻ മറക്കല്ലേ പഞ്ഞദിനങ്ങളും ഉള്ളിലെ ദു:ഖവും മാറുമെന്റോമന ച്ചങ്ങാതി(2) ഒന്നായി നമ്മൾ പൊര...